Постојат 6 групи животни. Тие се: цицачи, птици, инсекти, риби, влекачи и водоземци.

ПТИЦИ

Птиците живеат на целата наша планета. Летаат сами или во јата*.

*јато - група птици.

Речиси сите птици имаат пердуви, крилја и клун.

Птиците имаат многу силен, но лесен скелет. Затоа може лесно да летаат. Летаат со крилјата.

Сепак, постојат птици што не летаат. Такви се пингвинот и нојот.

Нојот е највисоката и најтешката птица. Нојот може да трча речиси онолку брзо колку и автомобил во движење.

Птиците ги несат своите јајца во гнезда. Птиците сами ги градат своите гнезда.

Само кукавицата нема свое гнездо. Кукавицата ги несе своите јајца во туѓи гнезда.

Некои птици живеат и на копно и во вода. Некои од овие птици се: патката, лебедот, фламингото и галебот.

Некои птици живеат на фармите. Овие птици се нарекуваат домашни птици. Некои од нив се: кокошката, петелот и пилињата.

Повеќето птици живеат во дивина. Овие птици се нарекуваат диви птици. Некои од нив, како папагалот и канаринецот ги чуваме како домашни миленичиња.

За папагалот се верува дека умее да зборува. Всушност, папагалот одлично имитира звуци.

Сепак, најубав е гласот на славејот.