Hey! 'musta ulit sa inyo. Nasa ikasiyam na linggo na tayo ngayon ng ikatlong termino. Kaunti na lang at matatapos na ng termino na ito. Excited na'ko. Pero syempre, alam ko naman na hindi ito magiging madali para sa amin tulad ng mga nagdaang mga termino namin. Mahirap talaga ang online class lalo na kapag walang-wala ka talaga. Pero sabi ko sa sarili ko hindi iyon magiging batayan para sumuko sa laban lalo na't alam ko na marami ang umaasa sa'kin.

Mabalik tayo sa pakay ko. Itong linggong ito ng mabalitaan namin ang napakaraming ganap sa PNU. Mayroon kaming dalawang online demonstration teaching sa Values Ed at AP. Mabigat para sa akin ang mga bagay na iyon lalo na't cellphone lang ang gamit ko. Pangalawa, may project pa kami para sa Innovation class namin na ramdam ko na hindi ko na napagtutuunan ng pansin at panahon. Nahihiya na talaga ako sa mga kagrupo ko. Pangatlo, ang research paper namin sa ProfEd namin. Mahirap kasi limitado lang ang panahon namin. At higit sa lahat ang aming cultural festival para sa FL. Napakaraming mga ganap talaga sa pagtatapos ng termino.

Hindi naman lahat puro negative vibes lang. Meron naman good, at iyon ang gusto kong ibahagi sa inyo. Nitong linggo lang, nabalitaan namin na sa October 04 na ang balik ng susunod na klase. Ito rin ang magiging simula ng internship namin para sa pinili kong landas. Nakakatuwa kasi mayroon kami ulit tatlong buwan na bakasyon, sulit para makabawi sa mga hirap at pagod na naranasan namin sa ilalim ng Emergency Remote Learning sa PNU. Habang iniisip ko ito, maraming bagay ang pumapasok sa isipan ko tulad ng mga "Ano kaya ang gagawin ko sa ganoong kahabang bakasyon?". Kasi naisip ko di rin magtatagal, mababagot ako sa bahay.

Hanggang sa nakausap ko ang isa kong kaklase at kaibigan ko rin. Tinanong ko siya kung ano ang balak niyang pagka-abalahan sa bakasyon. Medyo malabo pa ang mga plano niya para sa bakasyon. Pero dalawang bagay lang ang pinag-iisipan niya; maghanap ng trabaho o kaya ay tumulong na lang sa negosyo ng kaniyang ina. Bigla kong napansin na pareho rin pala naming pinag-iisipan maghanap din ng trabaho. Unti-unti nabubuo sa isipan ko na ituloy ang paghahanap ko ng trabaho hanggang sa bigla niyang banggitin ang agam-agam niya.